OLEH
ARIFIN
AKABHO-KABHONGO
Akabho-kabhongo ini notuduemo inano nakumala naegholi ghohia, sadaeghohiagho roono sau. Maanano sadaeghohiaghoo kadada. Nokalamo akabho-kabhongo, norato kaawu we daoa negholimo ghohia. Pada negholi, nosulimo we lambu. Nando we sala, akabho-kabhongo iano nowura roono sau nokamburuiane ghohia, sampe nowolo hohiano, neghohiaane roono sau we kangkaha. Norato kaawu we lambu nofenaemo inano akabho-kabhongo.
Ina : Hamaiemo ghohia kagholimu kabho-kabhongo?
Kabho-kabhongo : Ingka padamo aeghohia ane roono sau we sala.
Ina : Anagha sohae omeghohinegho roono sau?
Kabho-kabhongo : Ambamu anini, otudu kanau aeghoLi ghohia sadaeghohiagho roono sau. Dadihanomo awura roono sau akamburuianemo ghohia.
Ina : kabhoremu ihintu ini keda, patudhuku aniini sadaeghohiagho kadada kune ghane.
Pada kaawu anagha, Akabho-kabhongo notuduemo tora inano nakumala naegholi tagambiri. Gara Akabho-kabhongo mina namandehane medano hae tagambiri nagha. Nofenamo inano, ambano medano hae ga otagambiri nagha Ina? Ambano inano somura madea-deano peda kaedehano adhara, medanomo aitu otagambiri.
Nokalamo akabho-kabhongo, bhenekala-kala nobisa-bisara aegholi tagambiri, aegholi tagambiri, aegholi tagambiri, aegoli tagambiri. Mina nasesehae notitunomo Akabho-kabhongo. Aitu nolimpuane katughono neinano. Nofeki-fekiriemo, notudu kanau aegholi hae waitu anini inaku, ambano welo lalono Akabho-kabhongo. Nompona kaawu nofekirie, nopandehanemo, tamaka katandaino kaawu, notudue naegholi madea-deano medano kaedehano adhara. Nokalamo tora Akabho-kabhongo, nofura kaawu kaedehano adhara, nofekirimo lalono, medanomo aini hae otagambiri nepulughono inaku. Mina naseha-sehae noresiemo kaedeha adhara anagha sampe nomaho nopono kantono. Pada kaawu neresi, noghoro anemo doino neadhara anagha. Amba Akabho-kabhongo: “Ala doino itu pihihi.” Pada anagha nosulimo kabho-kabhongo. Norato kaawu we lambu, nofenaemo inano.
Ina : “Hamaie tagambiri kagholimu kabho-kabhongo?”
Kabho-kabhongo : ”Ainihae, nowane aedehano adhara karesino anini.
Ina : “Anagha sohae kaedehano adhara ini Kabho-kabhongo? Ingka aniini atuduko omegholi otagambiri maka sohae omeowagho kaedehano adhara ini.
Kabho-kabhongo : “ Ambamu samura madea-deano peda kaedehano adhara, otagambirimo itu. Awura kaawu kaedehano adhara aniini aresiemo inodi.
Ina : “ Doino hamaie?
Kabho-kabhongo : “ padamo aghoro ane nepihihi.
Ina : “ kaderono kabhoremu kune ihintu ini Kabho-kbhongo.
Nopusimo Inano nofekiri akabho-kabhongo ini. Ambano inano aitu atumobakomo bhela kabho-kabhongo, kalamo meghondoho modhi. Gara akabho-kabhongo mina tora namandehane medano hae modhi nagha. Nofetapamo tora neinano. Ambano medano hae omodhi nagha ina? Ambano inano somura okamokula itu naewantahi dhangkuno, medano aitu omodhi.
Nokalamo akabho-kabhongo. Nowulemo nolili mina naewura kamokula mowantano dhangku. Mina naseha-sehae, nowuramo omembe kawanta dhangkuno. Nokalahikiemo, maka nofetapomo akabho-kabhongo nemembe anagha. Modhi ohunda otumoba kanau? Ambano membe me.... nopusi akabho-kabhongo. Nofetapamo tora, modho ohunda otumoba kanau? Ambano tora membe me.... Nonturu kaawu nofetapa akabho-kabhongo tamaka taneme-meemo kaawu, welo lalono akabho-kabhono nohunda inia, nongari kaawu lalono nabisara umbe. Noalimo katapuno membe anagha, maka nosuli we lambu. Norato kaawu, notolamo Inano. Ina... aeghawamo omodhi sotumoba kanau. Nolimbamo inano nomaigho we ghabu, anagha sohae omeowagho omembe itu kabho-kabhongo, ambano inano. Amba akabho-kabhongo ingka aini haemo pada modhi so tumoba kanau, ingka kawantahino dhangkuno watu. Ambano Inano umbe pada newantahi dhangkuno itu, tamaka suano omembe nepulughoku inodi, kafosuli we katapuno membeno mie itu, maka meghondoho tora modhi sotumobako.
Nokalamo nofosulie wekatapuno membe aniini. Pada kaawu anagha, neghondohimo tora modhi. Nopona kaawu nolili, newuramo okamokula mewantano dhangku. Nofetapo akabho-kabhongo nekamokula anagha. Ambano ohunda otumoba kanau? Ambano kamokula anagha umbe. Pada anagha dokalamo we lambu akbho-kabhongo bhe modho anagha. Dorato kaawu notolamo tora inano akabho-kabhongo. Ina ainihaemo omodho sotumoba kanau. Nolimbamo tora inano, pedano aitumo patudhuku anini, pansuru telo lambu ini modhi.
Dengkoramo, dopowiseki omodhi bhe akabho-kabhongo. Nobisaramo moji. Ane atumobako ini angka-angkawi kabisarahaku. Amba akabho-kabhongo umbe. (Patudhuno akabho-kabhongo iano kabisarahano modhi nasumulikie nabisarane dua anoa).
Modhi : “Atumobakomo ini kabho-kabhongo.”
Kabho-kabhongo : “Atumobakomo ini modhi.”
Modhi : “angkafi pogauno inamu bhe amamu kabho-kabhongo”
Kabho-kabhongo : “Angkafi pogauno inamu bhe amamu modhi”
Modhi : “ (welo lalono nopare-are kanau akabho-kabhongo ini) nopokaruta kunae kabho-kabhongo”
Kabho-kabhongo : “Kopogaruta kune modhi”
Modhi : “ Kopare-are kanau kune kabho-kabhongo”
Kabho-kabhongo : “Kopare-are kanau kune modho”
Modhi : “Aghumoroe we wite akabho-kabhongo aini”
Kabho-kabhongo : “Aghumorae wi wite modhi aini”
Nofanaha kaawu lalono modhi, noepe-epesie nopare-are akabho-kabhongo, noeremo nosangke akabho-kabhongo maka nogoroe we wite, nokolita akabho-kabhongo nopee ne wite. Nomamaramo dua akabho-kabhongo, nofoni telo lambu, nosangke modhi maka noghoroe dua we wite. Nokolita dua kaasi modhi nope ne wite, nondawu bhe songkono, kosuli-sulino modhi nagha.
TAMAT
Tidak ada komentar:
Posting Komentar